Saturday, June 6, 2020

ក្រសួងសាធារណការ បើកចំហក្នុងការសហការជាមួយស្ថាប័នហិរញ្ញវត្ថុនានា​ ដើម្បីផ្ដល់ជម្រើសកាន់តែងាយស្រួលជូនប្រជាពលរដ្ឋ ក្នុងការទូទាត់ថ្លៃសេវាសាធារណៈ

អ្នកទស្សនា: Views
អ្នកនិពន្ធ:










(ភ្នំពេញ)៖​ លោកទេសរដ្ឋមន្ត្រី​ ស៊ុន​ ចាន់ថុល​ រដ្ឋមន្ត្រីក្រសួងសាធារណការ​ និងដឹកជញ្ជូន​ បានថ្លែងថា ក្រសួងសាធារណការ និងដឹកជញ្ជូន បើកចំហក្នុងការសហការជាមួយស្ថាប័នហិរញ្ញវត្ថុនានានៅកម្ពុជា ដើម្បីផ្ដល់ជម្រើសឱ្យកាន់តែច្រើនថែមទៀតជូនប្រជាពលរដ្ឋ ក្នុងការទូទាត់ថ្លៃសេវាសាធារណៈ ចំណេញពេលវេលា និងដើម្បីកាត់បន្ថយការចំណាយក្រៅផ្លូវការនានាផងដែរ។

លោកទេសរដ្ឋមន្ត្រី ស៊ុន ចាន់ថុល បានថ្លែងយ៉ាងដូចនេះ​នាថ្ងៃទី០៥​ ខែមិថុនា​ ឆ្នាំ២០២០​ ក្នុងឱកាសដែលលោកបានទទួលជួបពិភាក្សាការងារជាមួយគណៈប្រតិភូធនាគារ J Trust Royal Bank ដឹកនាំដោយលោកស្រី ហង់ ជូន ណារីតា នាយិកា នាយកដ្ឋានសេវាកម្មធនាគារផ្នែកសាជីវកម្ម។
ជំនួបពិភាក្សានេះធ្វើឡើងក្នុងគោលបំណងបង្កើតកិច្ចសហការរវាងធនាគារ ជេ ត្រាស់ រ៉ូយ៉ាល់ និងអគ្គនាយកដ្ឋានដឹកជញ្ជូនផ្លូវគោក នៃក្រសួងសាធារណការ និងដឹកជញ្ជូន ក្នុងការផ្ដល់ជម្រើសទូទាត់សេវាសាធារណៈជូនបងប្អូនប្រជាពលរដ្ឋ នៅក្នុងព្រះរាជាណាចក្រកម្ពុជា ដើម្បីរួមចំណែកជំរុញសេវាសាធារណៈឲ្យបានឆាប់រហ័ស តម្លាភាព និងប្រសិទ្ធភាពខ្ពស់។
លោកទេសរដ្ឋមន្ត្រី​ ស៊ុន​ ចាន់ថុល​ បានជម្រាបជូនធនាគារ ជេ ត្រាស់ រ៉ូយ៉ាល់ ថា​ ការបង់កម្រៃសេវាសាធារណៈ ទាំងអស់មកក្រសួងសាធារណការ និងដឹកជញ្ជូន ត្រូវបានធ្វើឡើងតាមរយៈភ្នាក់ងារហិរញ្ញវត្ថុ និងធនាគារជាដៃគូរ ដែលរួមមាន៖ ស្មាតលុយ លីហួរ តារាផេ ធនាគារអេស៊ីលីដា ធនាគារកម្ពុ និងធនាគារ វីង ដែលអាចបង្កភាពងាយស្រួល និងចំណេញពេលវេលាសម្រាប់បងប្អូនប្រជាពលរដ្ឋក្នុងការទូទាត់ថ្លៃសេវាសាធារណៈទាំងនោះ។
ឆ្លៀតក្នុងឱកាសនោះផងដែរ លោកទេសរដ្ឋមន្ត្រីបានផ្ដល់អនុសាសន៍ឱ្យប្រតិភូធនាគារ ជេ ត្រាស់ រ៉ូយ៉ាល់ សិក្សាអំពីនីតិវិធី និងបច្ចេកទេសជាមួយនាយកដ្ឋានព័ត៌មានវិទ្យា និងទំនាក់ទំនងសាធារណៈ របស់ក្រសួងសាធារណការ និងដឹកជញ្ជូន ក្នុងការតភ្ជាប់រវាងប្រព័ន្ធទាំងពីរ៕

ចេញផ្សាយថ្ងៃ:Saturday, June 06, 2020 rsatv-news.com